ZORAM TODAY| 1st September, 2025: Vawiin khan Hulhliap – Short Stay Centre, Neihbawi puala buatsaih, Ruihhlo ngai dam mekten a thlawna Thiamthil an zirna  - Skill Training Programme chu Lalrinpuii, Hon’ble Minister, Social Welfare, Women & Child Development Department in a hawng. 

He skill training thawh khatna programme hi Hulhliap - short stay centre course zo, batch khatna leh batch hnihna te pual a ni a; mi 84 in skill training hi an dawng dawn a ni. 

Skill training programme puala thiamthil zir tur ruahmante chu – aluminium fabrication, assistant electrician leh basic food processing course te a ni a; discipleship draining institute ah Pathian thu zir tur an awm bawk.

Aluminium fabrication leh assistant electrician hna hi Mission Foundation Movement (MFM) centre, Dawrpui Vengthar-ah September Ni 1 atanga September Ni 15, 2025 chhungin zirtir an ni ang a. Basic food processing course hi Mizoram Food Processing & Research Centre, Seling-ah riahchilhin September Ni 2 atanga September Ni 5 chhungin zirtir an ni ang. 

Social Welfare Minister Lalrinpuii chuan thiamthil zir turte chu Hulhliap centre an chhuahsan hnu pawha Ruihhlo laka an la fihlim zel avanga a lawmpui thu hrilhin, ruihhlo tel lo nun thlanga nun hman tum tlat zel turin a fuih a ni.

"Sorkarin an puala thiamthil zirna a buatsaihah hian taima leh am taka zira, tumruhna nen eizawn nana hman tlak ngei tura zir chhuak turin ka chah bawk a ni," a ti.

Hulhliap-Short Stay Centre chungchang report Dr. Lalhriatzuali Ralte, IAS, Special Secretary, LESDE leh Member Secretary, Hulhliap – Short Stay Centre hnen atangin ngaihthlak a ni a. Tunah hian Hulhliap batch 3 na kalpui niin, patient 170 an awm mek a, anni telin Hulhliap-a enkawl tawh zawng zawng hi mi 1,012 an nih thu Sorkar thuchhuah chuan a tarlang.